Продолжуваме со серијата на интервјуа, овој пат направивме интервју со генералниот секретар на Ракометната Федерација на Македонија, Влатко Тасевски.
1. Како е чувството и какви се амбициите како генерален секретар на Ракометната Федерација на Македонија?
- Чувството е голема чест, но и огромна одговорност. Ракометот е еден од најважните спортови во Македонија и да се биде на позиција која директно влијае на неговиот развој е сериозна обврска. Моите амбиции се јасни – стабилна, модерна и европски ориентирана Федерација, која ќе работи професионално, транспарентно и во интерес на сите клубови, играчи и тренери.
2. Дали ќе се залагаш да се вложува повеќе во младите категории во ракометот?
- Апсолутно. Без силни млади категории нема иднина. Наш фокус ќе биде системски развој на младинските селекции, подобра едукација на тренерите, поголем број турнири, кампови и континуитет во работата со таленти. Сакам Македонија повторно да биде препознатлива како земја што создава врвни ракометари, а не само да живее од поединечни генерации.
3. Кои се твоите планови како генерален секретар на Ракометната Федерација на Македонија?
- Плановите се поделени во неколку насоки: Јакнење на организациската структура на Федерацијата, подобра комуникација со клубовите, поддршка на судиите, тренерите и стручниот кадар, дигитализација и модернизација на процесите, подобра промоција на ракометот во јавноста, јасна стратегија за националните селекции. Целта е Ракометната Федерација да биде сервис за ракометот, а не институција затворена во себе.
4. Дали во иднина Македонија би имала можност да биде домаќин на машко Европско или Светско првенство?
- Реално, самостојно е тешко, но во коорганизација со соседни земји – апсолутно да. Македонија има публика, традиција и ракометна култура. Со подобра инфраструктура и силна организација, можеме да бидеме сериозен партнер за вакви големи настани. Тоа би било огромен импулс за спортот, туризмот и имиџот на државата.
5. Што ќе кажиш за крај на интервјуто?
- Би порачал дека ракометот е заедничка приказна. Само со единство, почит и заедничка визија можеме да го вратиме таму каде што припаѓа – во европскиот и светскиот врв. Јас сум подготвен да работам, да слушам и да се борам за македонскиот ракомет.
(фото – РФМ)📷
