Екипата на Текстилец ја започнува новата сезона со нови перспективи под водство на Бобан Попов во младите категории, но можно е и да биде како активен играч.
Раководството на Текстилец го најави вклучувањето на Бобан Попов во улогата на тренер на младинските категории за новата сезона. Попов, со свое долгогодишно искуство и постигнувања во Македонија и европските лиги, ќе донесе нова динамика и свежа перспектива во тренерскиот тим на клубот.
Попов, кој како играч освои титули во сите категории од пионери до сениори во Македонија, сега ќе се посвети на развојот на младите ракометари. Неговиот пристап ќе се фокусира на унапредување на моторичките способности, физичката и техничката подготвеност, како и на психолошката стабилност и тимскиот дух на младите играчи.
Со своето искуство стекнато во Португалија, Холандија и Германија, Попов ќе внесе нови методи и иновации во тренерската практика на клубот. Неговата цел е да создаде силни и конкурентни тимови преку интегрирање на современи тренерски техники и фокусирање на целосниот развој на играчите.
“Клубот Текстилец со нетрпение го очекува резултатот од оваа нова соработка и верува дека под водство на Бобан Попов, младинските категории ќе продолжат да напредуваат и да се истакнуваат на домашната и меѓународната сцена”, – изјавија од Рк Текстилец.
(фото – Рк Текстилец)📷
